Дунё университетини биласизми?

Бутун дунё илм ва билим ўчоғининг маркази бўлиб ҳисобланган  Москва Давлат университети 1775-йилнинг баҳор ойида М.Ю. Ломоносов ташаббуси билан очилган. Ўша пайтда университетда бор-йўғи учта: фалсафа, хуқуқшунослик ва тиббиёт факультетлари мавжуд бўлган. Университет профессор-ўқитувчиларининг ташаббуси билан турли вақтларда кўпгина илмий, маданият ва санъат муассасалари очилган. 1872-йили политехник музей, 1873-йили тарихий музей, 1883-йили тиббиёт ходимларининг жамияти, 1898-йилда эса педагоглар жамияти ва тасвирий санъат музейлари ана шулар жумласидандир.

                                                                                                                   MGU

Х1Х-аср охири ХХ-аср бошларида университет ўчоғида буюк олимлар мужассамлашган эди. А.Г. Столетов-физика мактаби асосчиси, И.М. Сеченов-физиология асосчиси, Ф.А. Бредихина, А.А. Белополрскийлар-астрономия йўналиши бўйича, К.А. Тимирязев-ўсимликлар физиологияси бўйича, В.В. Марковников ва Н.Д. Зелинскийлар-химия бўйича, Н.Е. Жуковский ва С.А. Чаплигин-аэродинамика бўйича, Н.В. Склифосовский-тиббиёт йўналиши бўйича, В.И. Вернадский-геохимия бўйича, гуманитар ва тарих фанлари йўналиши бўйича Т.Н. Грановский, С.М. Соловьева, В.Ю. Ключевский ва бошқалар. Кейинчалик университетда янги-янги илмий йўналишлар ривожланди.С.А. Чаплигин-аэрогидромеханика соҳаси бўйича, Н.Н. Лузин, В.В. Голубев, И.И. Привалов, П.С. Александровлар-функциялар назарияси бўйича, В.В. Степанов, С.Л. Соболев, М.А. Лаврентьев –дифференциал тенгламалар назарияси бўйича, А.Д. Архангельский-геология бўйича, Н.Д. Зелинскийлар-органик химия бўйича катта бебаҳо илмий ишлар олиб борганлар.

Ҳозирги кунда Москва Давлат университетида 20 дан ортиқ бўлим мавжуд бўлиб, улар ичида  1933- йили ташкил этилган университетнинг юраги ҳисобланмиш “механика-математика” факультетидир. Университет 33 қават бўлиб, 12-16 қаватларида  ушбу факультет жойлашган. Факультетнинг ташкил этилишида ва унинг ривожланишида буюк олимлардан  В.В. Голубев, И.Г. Петровский, А.Н. Колмогоров, П.С. Александров ҳамда бошқа етук ва таниқли олимларнинг хизматлари беқиёсдир.

Факультет университет базасида вужудга келган “Механика”  илмий текшириш институти билан узвий боғланган бўлиб, унда илмий текшириш ва лаборатория ишлари олиб борилади.

Университетнинг яна бир катта бўлимларидан бири физика факультети бўлиб, Россиядаги назарий ва экспериментал физикларнинг номлари  билан чамбарчас боғлангандир. Булар А.Г. Столетов, П.Н. Лебедев,Н.А. Умов, С.И. Вавилов, Е.И. Тамм, А.А. Власов, Л.Д. Ландау, Р.В. Хохлов ва бошқалардир.

Университет кўлами жуда беқиёсдир. Агар унинг ҳар бир хонаси билан мукаммал танишиб чиқмоқчи бўлсангиз, 105 йил вақт кетади. Университет ичида ётоқхона, ўқув аудиториялари, ўқув, илмий кутубхоналари, кинотеатр, кинозал, спорт заллари, овқатланиш шаҳобчалари, (талабалар учун аллоҳида , ўқитувчилар учун алоҳида), китоб дўкон ва дўкончалар, кийим-кечак дўконлари ва ҳоказолар жойлашган. Агар сизнинг ташқарига чиқишга иштиёқингиз бўлмаса, университет ичида олти ой яшашингиз мумкин. Кун ора университетда йирик-йирик дунё миқёсидаги олимлар, жамоат арбоблари, санъат аҳли ва бошқа атоқли кишилар билан учрашувлар бўлиб туради.

Университет доимо гавжум, ўзининг илм ва билим салобати билан мағрур ҳолда Москвадек буюк шаҳарнинг кўрки бўлиб туради. Унда дунёнинг 70 дан ортиқ давлатларидан келган талабалар билим оладилар. Уларнинг яшаши ва ўқиши учун ҳамма шароитлар муҳайёдир. Университет кутубхоналарида  хорижий мамлакатларда чоп этилган турли хил газета, журнал ва адабиётлар билан танишишингиз мумкин. Шунинг учун ҳам М.Ю. Ломоносов номидаги Москва Давлат университетини “Дунё университети” деб бежиз айтишмайди.

Мазкур университет Қирғизистон учун ҳам кўплаб олимлар ва мутахассисларни етказиб берганини яхши биламиз.Ҳозир ҳам бу ерда юзлаб қирғизистонлик ёшлар билим олишяпти. Азиз ёшлар сизларни ҳам ана шу олийгоҳда билим олишга насиб этсин.

Ҳамидилло ВАЛИЕВ,

Ўш вилояти Қорасув туманидаги А. Парпиев

номли ўрта мактабнинг физика ўқитувчиси

Написать ответ

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>