Яхшиликнинг катта-кичиги бўлмайди

Устозларимиз одобнома дарсларида бизга бир-бирларимизга яхшилик қилиш, мактабдаги тенгдошларимиздан ташқари, кўча-кўйда, маҳаллада хуллас қаерда бўлмасин  каттагами, кичикками яхшилик қилишимиз ҳақида кўп сабоқ беришган. Яхшиликнинг эса катта ёки кичиги бўлмайди дейишган.

Чиндан ҳам одатда  ҳар бир инсон бир-бирларига яхшилик  қилишни истайдилар. У қандай катта ёки кичик бўлмасин яхшилик қилган инсон албатта меҳрингизни қозониши шубҳасиздир. Меҳр-муҳаббат, очиқ кўнгиллилик, дилкашлик , ширинсўзлик хуллас, барча самимий одатлар жамул –жам бўлгандагина биз яхшилик  қилишнинг ўрни ва вақтини биламиз.

Биз ёшлар ҳозирча  катта яхшиликлар қилишга ожизмиз. Катта яхшилик қилишни кичигидан бошласак, кейингиларини ўрганиб борамиз.Ёрдамга муҳтож ёлғиз қариялар, ногиронларнинг оғирини енгил қилиш, уларга уй юмушларида ёрдам кўрсатиш, юкини қўлдан олиш ёки кўзи ожизларни бирон ердан етаклаб ўтказиб қўйиш ва бошқа шу каби ёрдамлар бизнинг қўлимиздан келадиган яхшиликлардир деб ўйлайман.Бундан ташқари мактабда бирга ўқиётган синфдошларга ёки кичик ёшдагиларга ўқиш ва ишларида кўмаклашиш  ҳам яхшиликлар қаторига киради деб ўйлайман.Лекин бу қилган яхшиликларни миннат қилиш, юзга солиб ташлаш  калтафаҳмликдир. Биз бундай қилишдан ўзимизни сақлашимиз лозим.  “Яхшилик қил,  дарёга сол” деб бежиз айтишмаган ота-боболаримиз.

Ҳа оз нарса вақти-вақти билан кўпга айлана боради. Яхши сифатларимизни каттагами-кичикками аста-секин яхшилик қилиш билан ошкор этсак, ўз ўрнимизни ҳаёт карвонидан топамиз. Аксинча оз-оздан ўқтин-ўқтин бировларга зулм қилсак, қараббизки биз карвоннинг ишончидан чиққан бўламиз.

Шунингдек, ширин тилимиз, ёқимли сўзимиз, очиқ чеҳрамиз, мулойим қалбимиз, меҳрли кўзимиз, ибратли ишларимиз билан ҳам биз ён-атрофимиздагиларга яхшилик қилган ва яхшиликка чақирган бўламиз.

Инсондаги юқорида тилга олиб ўтилган сифатлар ёшликдан шаклланиб боради. Биз ҳозирдан оз-оздан бўлса ҳам ана шу фазилатларни ўзимизда мужассам этиб борсак, у келгусида ўзининг самарасини беради. Шундай экан ҳозирдан биз ёшлар кичикми, каттами яхшиликлар қилиш учун,  катта-ю кичикдан ёқимли сўзларимиз, беминнат ҳаракатларимизни аямаслигимиз керак деб ўйлайман.

Зарина СОЛИЕВА,

Ўш вилояти Қорасув туманидаги

Муродхон Собиров  номли ўрта

мактабнинг 11-синф ўқувчиси

Написать ответ

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>