Мен ёшлигимдан компьютерга, унда ишлашга, Интернет оламига киришга энг асосийси инглиз тилини  ўрганишга жуда қизиқар эдим.Бу борада менга устозим мактабимизнинг чет тили ўқитувчиси Равшан Абақулов катта ёрдам берди десам хато бўлмайди.У биринчи бўлиб компьютерни ва лидерликни ўргатди.Менга унинг  инглиз тилини ўрганиш бўйича IT йўналишидаги тренинглари жуда ёқарди.У мендаги қобилиятни  сезиб IREX ( Айрекс) дастурининг TAG лойиҳасида қатнашишга таклиф қилди.Лойиҳанинг биринчи турида сўровнома (анкета) тўлдириш керак эди.Сўровномадаги тест саволларига жавоб бериб,  унинг биринчи туридан ўтдим.Иккинчи турда турли мавзуларда  лойиҳалар  ёзишни ўрганиб, “Етимхона” йўналишида “Эй болажон сенинг яқинларинг бор” мавзуси асосида лойиҳа ёзиб “Болалар уйи “га гуруҳим билан совғалар олиб бориб топширдик, ўйинлар ўргатиб, расмлар чизиш бўйича танловлар ўтказиб ғолибларни рағбатлантирдик.Бу лойиҳам билан иккинчи турдан муваффақиятли ўтиб, учинчи турга тайёргарлик кўрдим.

Учинчи турда инглиз тилида “Менинг оилам”, “Ўзим ҳақимда” ,  “Менинг хоббим”, “Лидер аёл” мавзуларида баён ёзиш лойиҳаси эди.Мен бу мавзулар ичидан “Лидер аёл “ мавзусини танлаб мактабимиз директори Динара Қурбоновадан инглиз тилида интервью олдим.Айрекс дастури вакиллари  Бакитбек Токубек ўғли билан Ойгул Исабековалар Бишкекдан келишиб бизнинг гуруҳимиздаги қизлар ўртасида лидерлик тўғрисида  тренинглар ўтказишди ва улар бизга Интернет орқали уй вазифалари беришди.Уй вазифаларини муваффақиятли топшириб учинчи турдан ҳам ўтиб TAG лойиҳаси финалисти-ғолиби бўлиб Бишкекка йўлланма олдим.

2011-йил 27 июнь куни республикамиз пойтахтига бордим.Ўш вилоятидан борган дугоналарим билан Бишкекнинг диққатга сазовар ерларини томоша қилдик.Бу ерда улуғ ёзувчимиз Чингиз Айтматовнинг қизи Жогорку Кенеш депутати Ширин Айтматова билан учрашдик.У бизга отаси, ўзининг ҳаёт йўли ҳақида ҳикоя қилиб берди. Мен унинг тимсолида севимли ёзувчим Ч.Айтматов билан учрашгандай бўлдим. Шунингдек биз АҚШнинг Қирғизистондаги элчиси билан  суҳбат қурдик. Бундан ташқари таниқли кинорежиссер Данияр Абдукеримов бизга янги тасвирга олган киносини намойиш қилиб берди. Унга ижоди ва киноси юзасидан саволллар бердик.

Шунингдек бу ерда бизга компьютердан қандай фойдаланиш, Интернетдаги сайтларга чиқиш, унга регистрация бўлиш, дўстлар топиб улар билан мулоқот қилиш, видеороликлар тайёрлашни ўргатишди.Бу ерда Айрекснинг директори Чинара Омуркулова билан ҳам учрашдик. У бизга Айрекс дастурининг ютуқлари ва келажаги ҳақида гапириб берди.Айниқса менга Америкадан келган волонтерлар Миша Девс, Роуэлла Ромасларнинг тренинглари ёқди.Улар бизни компанияларга бўлишди.Мен Нурзат Жапарқулов билан битта компанияда ишлаб яқиндан танишдик. Волонтерлар бизга мижозлар билан мулоқот қилиш, таниқли одамлардан интервью олиш, лидер бўлиш сирларини ўргатишди.Улар бизни дам олиш кунлари республикамизнинг энг гўзал оромгоҳларидан бири  Алаарчага олиб боришди.Бу ердаги баланд тоғлар, кўм-кўк арчалар, гўзал табиат манзараси, мусаффо ҳавоси менга жуда-жуда ёқди.Мен Бишкек сафаридан жуда кўп дўстлар орттириб, билимларимни янада ошириб, олам-олам қувончлар билан Ўшга қайтдим.Мен Айрекс дастуридан, унинг лойиҳаларида қатнашаётганимдан бахтиёрман ва жуда миннатдорман.Мен ҳақиқий лидер бўлиб етишдим. Мен аввалги оддий Нилуфар эмасман.

Бишкекдан қайтиб келгандан кейин Айрекс дастурининг лойиҳаларида  қатнашишни давом эттирдим.Унинг тўртинчи турида “Коомдук долбор” мавзуси бўйича лойиҳа ёздим ва “Small Grant” яъни кичик грант – деворга илинадиган Америка доскаси ва 150 АҚШ  доллари миқдорида грант  ютиб олдим.Грант пулини лойиҳага сарфлаб мактабимиздаги 12 нафар қизга компьютерда ишлаш,  Интернет орқали сайтларга кириб чет эллик дўстлар орттиришни, инглиз тилида сўзлашишни ва лойиҳа тайёрлашни ўргатдим.Шу билан бирга TOEFI дастури доирасида инглиз тилини ўрганиш бўйича лойиҳада иштирок этиб, икки йил мобайнида инглиз тилини бир тийин ҳам тўламай ўргандим.

Мен келажакда инглиз тилини мукаммал ўрганиб таржимон бўлмоқчиман. Бугунги  кунда ACCESS  дастури доирасида инглиз тилини  ўрганиш бўйича лойиҳада иштирок этиб иглиз тилини ўрганишни давом эттиряпман.

Бугун лидер қизман, мактабда «Энг мыкты окучу» деган номни олишга ҳам  сазовар бўлдим.Менинг бу даражага етишишимда авваламбор устозим Равшан Абақулов ҳамда Айрекс дастури лойиҳалари етакчиларидан умрбод миннатдорман.Мен келгусида ҳам бу дастурнинг лойиҳаларида иштирок этишни давом эттираман ва инглиз тилини мукаммал ўрганиб, олий ўқув юртига ўқишга кириб  муқаддас орзуимга албатта етишаман.

                                                                                 Нилуфар ВАЛИЕВА,

                                                    Ўш вилояти Қорасув

туманидаги А. Парпиев номли

                                                    ўрта мактабнинг 11-синф ўқувчиси