Бугунги кунда Қирғизистон Республикаси Таълим ва фан вазирлиги буйруғи билан янги ёзилган дарсликларни синовдан ўтказиш учун танлаб олинган мактабларда 4-синф учун яратилган янги “Қирғиз тили”, “Математика”, “Ватаншунослик”, “Русский язык и чтение”, “Тасвирий –бадиий меҳнат”, “Мусиқа”, “Адабий ўқиш” ва “Ўзбек тили” дарсликлари синовдан ўтказилмоқда.

Ўзган шаҳридаги Амир Темур номли ўрта мактаб директори Мухторжон Носиров бошланғич синф ўқтувчилари билан янги дарсликлар синови қандай бораётгани тўғрисида суҳбатлашаётган пайт.                    

Чунончи Ўзган тумани Ўзган шаҳридаги ўқув ўзбек тилида олиб бориладиган Амир Темур номли ўрта  мактабда  мазкур синовни ўтказишга алоҳида эътибор берилмоқда. Ҳар бир ўқувчи  янги дарсликлар билан  таъминланган бўлиб, улар дарс давомида ҳамда уйларида дарсликлардаги мавзуларни ўрганиб боришмоқда. Дарсликнинг ютуқ ва камчиликлари ўтилаётган ҳар бир мавзу  давомида  ўқитувчи ва ўқувчи томонидан муҳокама қилиниб, уларга  баҳо бериб бориляпти.Бу  жараён янги ўқув йили охиригача давом этади.

Мактабнинг Султонхон Абдуллажонова, Лутфия Каримжонова, Барнохон Ҳайдарова, Юлдузхон Абдуназарова, Миножатхон Абдуллажонова ва Матлюба Сигбатуллина каби кўп йиллик тажрибага эга ўз касбининг усталари ҳар бир дарсликка  ўзларининг очиқ-ойдин баҳоларини бериб боришмоқда.

                                                                                                                                                Алишер АЗИМОВ,

Ўзган шаҳридаги В.И. Ленин номли

ўрта мактабнинг 11-синф ўқувчиси