Адиба билан учрашув

Истеъдодли шоира Матлубахон Мусабоева номи бугунги кунда  нафақат Ўзган шаҳри , балки бутун республикамизга таниш. У ўзининг дилларни қитиқлайдиган, уларга қувонч, маънавий ва руҳий озуқа берадиган шеърлари билан қалбларга кириб борган. М.Мусабоева Ўзган шаҳридаги В.И.Ленин номли мактаб директори, жамоатчилик асосида ишлайдиган миллатлараро муносабатлар бўйича Ўзган туман кенгаши раисаси, Ўзган шаҳар хотин-қизлар кенгаши раисаси бўлишига қарамай,  илҳоми жўшиб шеърият гулшанида самарали ижод қилиб келмоқда.Унинг бугунги кунда 10 дан ортиқ шеърий тўпламлари босилиб, ўз ўқувчиларини топган. Кўплаб шеърлари қирғиз тилига ўгирилган, ўзи ҳам бу тилда ижод қилиб келмоқда. Қирғизистон Ёзувчилар уюшмаси аъзоси. Унинг мухлислари  давраларига тез-тез таклиф қилиб туришади.

Яқинда Ўш шаҳридаги В.И.Ленин номли мактабнинг ўқитувчилар ва ўқувчилар жамоаси М.Мусабоевани учрашувга таклиф этишди.Шунингдек кечага Ўш Давлат университетининг доценти, филология фанлари номзоди Саидакбар Махсумхонов, шоира Ойгул Абулфайзиевалар ҳам ташриф буюришди. Учрашувни мактаб директори Д.Мамадалиев очиб, шоирага қимматли вақтини аямай ташриф буюргани учун мактаб жамоаси номидан миннатдорчилик изҳор этди. С.Махсумхонов, О.Абулфайзиевалар сўзга чиқиб, шоиранинг ижодий фаолияти ҳақида учрашув қатнашчиларига ҳикоя қилиб беришди, у ёзган шеърлар хусусида ўз фикр ва мулоҳазаларини изҳор этишди.

Матлубахон Мусабоева ўзининг ёзган шеърларидан ўқиб бериш билан бирга келгусидаги ижодий режаларини мухлислари билан ўртоқлашди, уларнинг берган саволларига жавоб берди.

Мактаб ўқувчилари буюк мутаффакир, ғазал мулкининг султони мир Алишер Навоийга бағишланган саҳна кўринишини намойиш этишди. Шоира ижодига мансуб ёд олган шеърларини ўқиб беришди.

Қизиқарли  ва мазмунли ўтган бу учрашувни мактабнинг ўзбек тили ва адабиёти ўқитувчиси, шоира Моҳидил Ҳасанова ташкил этди. Бу тадбир унинг иштирокчиларида катта таассурот қолдирди. Ўз ўрнида шоира М.Мусабоева ўшлик ҳамкасбларини ва мухлисларини кўҳна Ўзган шаҳрига таклиф этди.

Муҳаммадамин ҲОЖИАКБАРОВ,

Ўш шаҳридаги В.И.Ленин

номли мактаб ўқувчиси

Написать ответ

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>